Nikola Yurçeviç: "Hər suala açığam, tənqidə belə" - MÜSAHİBƏ

10.09.2019 | 628 dəfə oxunub

Millimizin baş məşqçisi Nikola Yurçeviç Avro-2020-nin seçmə mərhələsində Xorvatiya ilə bərabərə qaldıqları oyundan (1:1) sonra mətbuat konfransında jurnalistlərin suallarını cavablandırıb:

- Mən nəticəyə və komandanın oyununa görə xoşbəxtəm. Oyunçularımla qürur duyuram. Heyətində ulduzlar olan dünya ikincisinə qarşı oynayırdıq. Xorvatiyanı ədalətli oyuna görə təbrik edirəm. Azarkeşlərimizə təşəkkür edirəm. Onlar xüsusilə, ikinci hissədə bizə böyük dəstək oldular. Mən xorvatiyalıyam, ancaq bu gün bütün ürəklə azərbaycanlı idim. Hamı bu sevincə artıqlaması ilə layiq idi. Son vaxtlar bəzi matçlarda yaxşı oynasaq da, nəticə baxımından üzümüz gülmürdü. Ancaq bu dəfə sevindirici nəticəyə nail olduq. Emosionalam, danışmaqda çətinlik çəkirəm. Xoşbəxtəm ki, azarkeşlər də özlərini xoşbəxt hiss edirlər.

- Düşünmürsünüz ki, əvvəlki matçlarda nəticənin olmaması heyətin düzgün qurulmaması ilə bağlı idi?

- Hər suala açığam, tənqidə belə. Çətin sualdır. Biz bilmirik ki, digər futbolçuları oynatsaydıq, nəticə necə olardı. Bunun konkret cavabı yoxdur. Hər kəs fikrini bildirir. Mən çalışırdım ki, oyunu dəqiq analiz edim. Macarıstan və Slovakiyaya qarşı yaxşı oynamamışdıq. Əsas səbəb fiziki çatışmazlıq idi. Bizim iki yolumuz var: xal qazanmağa çalışmaq və ya gələcəyi düşünmək. Bəhlul Mustafazadə, Anton Krivotsyuk, Ramil Şeydayev, Mahir Emreli, Ömər Buludov və Renat Dadaşov çox gəncdirlər. Onlar gələcəkdə komandanın özəyini təşkil edəcəklər. Bunları başa düşürəm. Ancaq hesab edirəm ki, mənim bunları qeyd etməyim sizin tərəfinizdən də başadüşülən olacaq.

- Rəqib baş məşqçi Emil Balayevin oyununu qeyd etdi. Sizə görə komandanın ən yaxşısı kim idi?

- Məncə, Balayev mükəmməl idi. O, bizi bir neçə qoldan xilas etdi. Xüsusilə, ilk 20 dəqiqədə. Çünki Xorvatiya çox aqressiv, hücumameylli başlamışdı. O, həmin dəqiqələrdə komandanın köməyinə çatdı.

- Zaqreb və Kardiffdə yaxşı oyun və bu gün Bakıda ilk xal. Növbəti hədəf nədir?

- Hansısa komanda favorit deyilsə və top-klass komandaya qarşı oynayırsa, bütün futbolçular 100 faiz oyununu göstərməlidir. Və bir nəfər xüsusi oyunçu lazımdır ki, ağılasığmaz şeylər etsin. Bugünkü Emil Balayev kimi. Gələn matçlarda da belə olmalıdır.

- Riçard Almeyda zədəli olmasaydı, Emin Mahmudovun meydana çıxmaq şansı olardımı?

- Dünən də mətbuat konfransında demişdim ki, o, çox yaxşı futbolçudur. Ancaq biz balansı qorumalıyıq. Müdafiəni də, rəqibi də düşünməlisən ki, onlar nəyə qadirdilər, biz nə edə bilərik. Emini pleymeyker kimi görürəm. O, topla yaxşı işlər görə bilər. Ancaq belə matçlarda topla çox oynamağımız elə də böyük ehtimal deyil. Standart vəziyyətləri də nəzərə almalıyıq. Belə halda hava toplarında yaxşı olanları meydana buraxmalıyıq. Bir məşqçi bütün oyunun görməlidir. Bütün bunlar səbəblərdir.

- Tsikl boyu stabil oynamaq üçün bu futbolçular yetərlidimi?

- Sualın cavabını hələ bilmirəm. Əvvəlcə son baş verənləri həzm etməliyəm. Bizim planımız da budur ki, elə futbolçularımız olsun, ağıllı-başlı oynasınlar, təkcə ürəklə yox. Bunu birləşdirmək qısa zaman kəsiyində alınmaz. Ümid edirəm ki, bu işdə hamı dəstək olacaq. Əvvəlki matçlarda Rahildə, Antonda alınmayan epizodlar və ya səhvlər olurdu. Belə hallarda medianın reaksiyası yadımdadır. Bəhlul son iki oyunda çıxış etdi. Oynayır, pis görünmür. Amma top səviyyəli futbolçulara qarşı oynayanda səhvlər olacaq. Çünki o, gəncdir və həmişə bu tempdə oynamır. Gənclərə dəstək olmaq lazımdır ki, onları yığmamız üçün qazandıraq. Yeri gəlmişkən, Renata mən şans verəndə bəzi insanlar anlayışla qarşılamırdılar ki, nəyə görə oynayır. Bir müddət sonra “Vulverhempton” onu transfer etdi. Deməli, qabında nəsə var. Təkcə potensial olması kifayət deyil, həmin futbolçulara şans da vermək lazımdır ki, inkişaf etsinlər.

- İkinci dəfə Bakıda xorvat məşqçi ilə Xorvatiyanı büdrətdik. Bu amilin vacib olduğunu düşünmürsünüz ki? Özünüz də dediniz ki, Macarıstan və Slovakiyaya qarşı belə oyun alınmamışdı...

- Bəlkə də, səbəblərdən biri budur. Mən Xorvatiyanın mentalitetini bildiyim üçün bu, üstünlükdür. Slovakiya və Macarıstana qarşı da mümkün qədər yaxşı hazırlaşmışdıq. Biz xüsusilə slovakların üstünlüyünü bilirdik ki, standart vəziyyətlərdə güclüdürlər. Bizim belə oyunçularımız var, ancaq bəs etmir. Əvvəl də demişdim ki, Slovakiyadan ikinci qolu buraxdıqdan sonra geridönüş çətin idi. 1 qolu sığortalamaq olur ki, bunun bu gün şahidi olduq. Bu gün də bunu gördük. Qol buraxdıqdan sonra bərabərlik qolunu vurduq, qələbə üçün də çalışdıq. Bir səhv həlledici ola bilir.



Şərh yazılmayıb
ŞƏRH YAZ
Adınız *  
E-mail    
Təhlükəsizlik kodu    
Kodu daxil edin *  



Çox oxunan xəbərlər
"Qurban Qurbanov stadionda yatıb-dururdu" - Keçmiş "Qarabağ"lı futbolçu
Son xəbərlər

20.09.2019

11:15  "Qarabağ" - "Sevilya" FOTOLENT

19.09.2019

19:49  "Qarabağ" - "Sevilya" -HEYƏTLƏR

00:54  PSJ - "Real" - 3:0 VİDEO

18.09.2019

12:29  Günün oyunlarına necə baxaq? - TV AFİŞA

01:28  "Zalsburq" - "Genk" - 6:2 VİDEO

01:08  "Ayaks" - "Lill" - 3:0 VİDEO

00:09  "Lion" - "Zenit" - 1:1 VİDEO

17.09.2019

20:04  Messi qayıdır - Həkimlər razılıq verdi

20:01  Son 2 min bilet - "Qarabağ" - "Sevilya" görüşü

19:59  "Qarabağ"da ciddi itki - "Sevilya"ya qarşı oynamayacaq

15:31  "Qurban Qurbanov stadionda yatıb-dururdu" - Keçmiş "Qarabağ"lı futbolçu

12:17  Günün oyunlarına necə baxaq? - TV AFİŞA

   
  O Q H M T-f X
1. Neftçi 26 16 7 3 59-19 60  
2. Qarabağ 26 18 6 2 47-22 55  
3. Səbail 26 12 5 9 33-29 41  
4. Qəbələ 26 9 9 8 30-29 36  
5. Sabah 26 7 6 13 20-37 27  
6. Zirə 26 6 7 13 24-39 25  
7. Sumqayıt 26 6 5 15 22-42 23  
8. Keşlə 26 5 5 16 24-41 20  
11.11Sumqayıt ---Keşlə
11.11Qəbələ ---Qarabağ
10.11Səbail ---Sabah
10.11Neftçi ---Zirə
24.11Qarabağ -Sabah
24.11Keşlə -Qəbələ
25.11Zirə -Sumqayıt
25.11Səbail -Neftçi