Qurban Qurbanov: "Belə məğlubiyyətlər hər mövsüm olub"

Azərbaycan Premyer Liqasının 18-ci turunda "Qəbələ"yə qarşı görüşdən (3:0) sonra  "Qarabağ"ın baş məşqçisi Qurban Qurbanov mətbuat konfransında oyun haqda danışıb: 

- Baxmayaraq ki, "Qəbələ" ilk hissədən sonra hesabda 3 top fərqi ilə geridə idi, öz yaxşı oyununu sona qədər qoruyub saxladı. Elmar Baxşıyevin komandasına uğurlar arzu edirəm.

Futbolçular çox istəkli idilər. Uşaqlara oyundan sonra razılığımı bildirdim. Bizim bol qollu oyunlarımız olur, amma bəzən qol vurmağa çətinlik çəkirik. Bu da rəqiblərin bizə qarşı daha diqqətli olması deməkdir. İndi fikrimizi qarşıdakı oyunlara kökləyirik.

- "Neftçi"yə məğlubiyyətdən sonra komandada dirçəliş hiss olunur. Sizə elə gəlmirmi ki, o məğlubiyyət komandanı yuxudan oyatdı?

- Bəzən belə oyunlar müsbət bəhrələr verir. Amma" Neftçi"yə kimi umumi məhsuldarlığımız pis deyildi. Komanda yanvar ayından sonra çox istəkli idi. Derbilərdə düşünmədiyin epizodlar olur. Ola bilsin psixoloji təsiri var idi, amma mövsümün sonunda biləcəyik ki, faydası olacaq, ya yox. Belə məğlubiyyətlər hər mövsüm olub. Sadəcə, bu məğlubiyyətdən düzgün nəticə qazanmaq lazımdır. Sırf deyə bilmərəm ki, onun təsiri olub, ya yox.