Edin Nuredinoski: "Milli komandada oynamağımla fəxr edirəm" Müsahibə

13.03.2013 | 5419 dəfə oxunub

“Bakı”nın heyətində çıxış edən qapıçı Edin Nuredinoski Azərbaycana gəldiyi ilk gündən azarkeşlərin etimadını qazandı. Son dərəcə mədəni və kübar olan Edin Makedoniya milli komandasının da çərçivə qoruyucusudur. 31 yaşlı kiperin bioqrafiyası olduqca zəngindir. Bu barədə “Toplu”ya danışan makedonun müsahibəsini təqdim edirik:

Yəqin ki “Toplu Bakı” jurnalını izləyirsən?

Hə, əlimə keçən kimi şəkillərinə baxıram. Uşaqlar üçün maraqlı layihədir.

Demək, müsahibəmizin də məhz uşaqlar üçün maraqlı olmasına çalışmalıyıq…

(Gülür). Əlbəttə. Onları bu gün çempionatda nələrin baş verməsi  o qədər də maraqlandırmır. Onlar məni tanımaq, karyeramda rastlaşdığım maraqlı hadisələr və əziyyətlər barədə daha çox maraqlanır.

Onda başlayaq uşaqlıq illərindən. O illəri necə xatırlayırsan?

Mən Skopyedə- paytaxtda doğulmuşam. Əcdadlarım türk əsilli olublar. Lakin biz dini inancımızı saxlasaq da, danışıq dilimiz unudulub. Nadinc uşaq olmamışam. Elə o vaxtdan hamı ilə yola gedən sakit təbiətim var. Valideynlərim evimizin yaxınlığındakı fermada işləyirdi. 7-8 yaşımdan  evdə, demək olar, nəzarətsiz qalırdım. Futbolu çox sevirdim. Mançestr Yunaytedin o vaxtkı qapıçısı Petr Şmeyxeli özümə kumir seçmişdim. Məhəllə uşaqları evə zəng vurub, məni parka futbol oynamağa çağırardılar. Çoxu məndən yaşca böyük olduğu üçün məni qapıya qoyurdular ki, əzilməyim. Elə beləliklə də,  oldum qapıçı.

Bəs “Vardar” a necə yazıldın?

Bütün günü futbol oynamaqla keçirirdim. Evdəkilər əlimdən bezmişdi. Hər gün qapıda duranda ora-bura yıxılıb topu çıxaranda üst-başım toz, palçıq olurdu. Anam isə evə gələn kimi şikayətlənirdi ki, bu nə vaxt qurtaracaq. Axırda elə qərara gəldilər ki, məni futbola yazdırsınlar ki bu qədər  paltar yumağa da ehtiyac qalmasın. Atam məni “Vardar”a gətirdi. 10 yaşımdan orada məşqlərə başladım. 12 yaşımda klubun   idman gimnaziyasına daxil oldum. 15 yaşımda  boyum hündür olduğundan məni əsas komandaya cəlb etdilər. Çox istedadlı idim.  İlk dəfə 16 yaşımda Makedoniya Superliqasında debüt etdim. Mən klubun tarixində 16 yaş yarımında meydana çıxan ən gənc qapıçı kimi tarixə düşdüm.

Makedoniyada əhalinin 30-35%-i müsəlmanlardır. Hər hansı dini ayrıseçkilik yoxdur ki?

Keçmiş Yuqoslaviya dini tolerantlığın simvolu idi. Burada müxtəlif xalqlar və dinlərin nümayəndələri qardaş kimi yaşayırdı. Bu dövlət dağılanda bəzi ölkələrdə qismən belə narazılıqlar olmuşdu. Makedoniyada isə belə şeylər yoxdur. Bəlkə də ola bilər. Lakin mən həmişə pozitiv fikirləşirəm. Əgər bir gün milliyə dəvət almaramsa, bunu dini etiqadımla yox, zəif olduğumla əlaqələndirəcəyəm. Tolerantlıq olmasaydı,  mən milli komandanın qapısını qorumazdım. Bizdə yeganə siyasi problem yunanlarladır.

Mili komanda oyunçusu adi klub futbolçusunun heç vaxt keçirmədiyi hissləri yaşayır, xalqını, bayrağını təmsil etdiyi üçün daha məsuliyyətli olur. Sənin üçün milli komandada oynamaq nə deməkdir?

Mən bir makedon kimi milli komandada oynamağımla fəxr edirəm. Hələ uşaqlıqdan özüm üçün  3-4 arzu tutmuşdum. Onlardan biri milli komandanın formasını geyinmək idi. İlk dəfə 1999-cu ildə Qətər millisi ilə yoldaşlıq oyununda meydana çıxmışam. 25 dəqiqə meydanda oldum. Bütün dostlarım stadionda idi. Elə sevinirdim ki, sanki, məşhur ulduz idim. Adımı stadionda çəkəndə isə az qaldı ağlayam. O vaxtdan milliyə çağrılıram. Çox xoşbəxtəm ki, bu cür tarixi olan qədim bir xalqı təmsil edirəm. Əlbəttə milli futbolçular etdikləri hər bir hərəkətə fikir verməlidir. Mən də öz davranışımda buna çalışıram.

Karyeran ərzində ən yaddaqalan oyunun hansı olub?

2010-cu ilin mayında Rumıniya və Makedoniya arasında keçirilən  yoldaşlıq oyununda biz 0-1 hesabı ilə qalib gəldik. Həmin görüşdə mən çox yaxşı oynayıb, qapımdan top buraxmadım. Bu oyunu hər zaman xatırlayıram.

Hansı qapıçıların oyununu bəyənirsən?

Yaxşı qapıçı özünü stabil oyunu ilə sübut etməlidir. Belə qapıçılar çox azdır. Buffon, Kasilyas və Peter Çexi bəyənirəm. Onlar öz işlərinin ustalarıdır.

“Bakı” futbol klubunda 50-dən çox qapıçı yetişir. Onlara peşəkar futbolçu olaraq hansı tövsiyələrin var?

Qapıçı- futbolda ən çətin mövqelərdən biridir. Bizim yeniyetmə və gənclərə səbirli olmağı, məsuliyyətli olmağı tövsiyə edirəm. Unutmasın ki, onlardan arxada heç kim yoxdur. Qapıda qərar verəndə diqqətli olsunlar.



Şərh yazılmayıb
ŞƏRH YAZ
Adınız *  
E-mail    
Təhlükəsizlik kodu    
Kodu daxil edin *  



Çox oxunan xəbərlər
Son xəbərlər

12.03.2024

24.07.2023

22.07.2023

21.07.2023

20.07.2023

19.07.2023

18.07.2023

17.07.2023

16.07.2023

15.07.2023

   
  O Q H M T-f X
1. Neftçi 28 18 5 5 47-25 59  
2. Qarabağ 28 16 9 3 64-18 57  
3. Sumqayıt 28 10 9 9 30-31 39  
4. Zirə 28 8 14 6 28-28 38  
5. Sabah 28 7 8 13 28-39 29  
6. Keşlə 28 5 11 12 25-40 26  
7. Qəbələ 28 5 11 12 23-44 26  
8. Səbail 28 5 9 14 21-42 24  
08.05Səbail ---Neftçi
08.05Keşlə ---Sumqayıt
09.05Zirə ---Qəbələ
09.05Sabah ---Qarabağ
14.05Sumqayıt -Neftçi
14.05Qarabağ -Keşlə
14.05Qəbələ -Sabah
14.05Zirə -Səbail