“Dənizlispor”un baş məşqçisi: “Mənlik olsaydı, Raili millinizə dəvət edərdim” Müsahibə

“Dənizlispor”un baş məşqçisi Özcan Bizatinin “Het-trik news” qəzetinə müsahibəsi

- Komanda son 4 oyunda 10 xal toplamağı bacardı. Ardıcıl 4 məğlubiyyətdən sonra çoxları düşünürdü ki, artıq “Dənizlispor” aşağı dəstəyə yuvarlanacaq...

- Uşaqlar toparlana bildilər, qalan görüşlərdə aslanlar kimi mücadilə etdilər. Nəticədə 3 qələbə və 1 heç-heçə ilə üzərlərinə düşən vəzifəni yerinə yetirmiş oldular. Futbolçulara təşəkkür edirik, onlarla qürur hissi duyuruq.

- Həmyerlilərimiz Arif İsayev və Rail Məlikovla vəziyyət nə yerdədi? Rail əsas heyətdə özünə yer etsə də, Arif oyuna sonradan qoşulur. Bunun səbəbi nə idi?

– Öncə qeyd edim ki, hər iki azərbaycanlı futbolçu “Dənizlispor”da özünü çox yaxşı tərəfdən göstərə bilib. Həm bir idmançı, həm də insan kimi hörmət qazanıblar. Hər ikisi yüksək səviyyəli futbolçudu və onları gələn mövsüm üçün də sərəncamımda görmək istəyirəm. Artıq bu barədə hər ikisi ilə söhbətim olub. Komandada qalmalarını istədim. Çünki mənim oyun tərzimə uyğundular. Yəqin ki, yaxınlarda bu haqda qəti qərar qəbul edəcəklər.

O ki qaldı digər sualınıza - Rail əsas heyətin daimi üzvüdü. Müdafiədə çox etibarlı oyun nümayiş etdirir. Arifə gəlincə, onun oynadığı futbol məni qane edir. Azərbaycan millisindədə oynaması necə bir futbolçu olduğundan xəbər verir. “Ankaragücü” ilə səfər oyununda meydana sonradan daxil olmasına baxmayaraq, qol vura bildi. Arifin ehtiyatda qalmasının əsas səbəbi zədə ilə bağlı idi. Bu səbəbdən bir neçə oyun onu ehtiyatda saxlayaraq sonradan oyuna qoşdum. Nəticədə göz önündədi. Vurduğu qol və apardığı mücadilə ilə bizi sevindirməyi bacardı.

- Deyilənlərə görə, Raillə bir neçə Superliqa klubu yaxından maraqlanır. Əgər belə bir təklif olarsa, Railə nə məsləhət görərdiniz - Superliqa klubuna keçsin, ya Dənizlidə qalsın?

- Rail elə bir futbolçudu ki, istənilən Superliqa klubunda rahat oynaya bilər. Məndən olsa, “Dənizlispor”da qalmasını istəyərdim. Komanda ilə hələ bir illik sözləşməm var. “Dənizlispor”un növbəti mövsüm qazandığı nəticələrə mən cavabdeh olacam. Bu yöndən, Rail kimi peşəkarın əlimdən çıxmasını istəməzdim. Amma, digər tərəfdən Rail bura gələrkən, hədəfinin Superliqa komandalarına keçmək olduğunu bildirmişdi. Yəni, “Dənizlispor” onun üçün bir tramplin rolunu oynaycaqdı. Təbii ki, əgər bu baş verərsə və Railin istəyi əsas olacaq. Onun qarşısında əngəl olmayacağıq.

- Railin son zamanlar Azərbaycan milli komandasına çağırılmamasının səbəbini nədə görürsünüz?

- Bunun iki səbəbi ola bilər. Birincisi, onun mövqeyində Raildən daha yaxşı çıxış edə bilən gənc futbolçunun olması. Həqiqətən belə birisinin varlığından xəbərim yoxdu. Yəni, millinizdə sağ cinah müdafiəçisi rolunda kimin oynamasından o qədər  də məlumatlı deyiləm. İkinci səbəb isə öz aralarında hər hansı problemin olmasını deyə bilərəm. Əgər həqiqətən belə bir problem varsa. Hər halda millinin baş məşqçisinin işinə qarışmaq düzgün olmazdı. Yəqin ki, hansı futbolçunun xidmətindən istifadə etməyi Foqts hamıdan yaxşı bilər. Amma, mənlik olsaydı, Raili həmən millinizə dəvət edərdim. Göstərdiyi futbola Rail bundan artığına da layiqdi.

- Komandanıza başqa azərbaycanlı futbolçular dəvət etmək haqda düşünürsünüzmü?

- Düzü, bu haqda fikrimiz var. Railgillə görüş zamanı bu haqda da söhbətimiz oldu. Azərbaycan milli komandasında da çıxış edən bir neçə futbolçunun oyununu izləmişəm. Uşaqlara da sözüm bu oldu ki, əgər bizim oyun tərzimizə uyğun gələn futbolçular varsa, mənə desinlər. Növbəti mövsüm komandamda daha 3-4 azərbaycanlı futbolçunun olmasını istərdim. İyunun əvvəlində milli komandanızın Bakıdakı oyununu izləməyə gələcəm. Orada gözaltı etdiyim futbolçuların oyununa bir daha baxmaq istəyirəm. Əgər qarşılıqlı razılıq əldə olunarsa, müqavilə bağlayacağıq.

- Konkret olaraq hansı futbolçularla maraqlanırsınız?

- Bunu indidən söyləmək düzgün olmaz. Yaxın zamanlarda əgər razılıq əldə olunarsa, bu haqda yəqin ki, hamının xəbəri olacaq. Hər halda başqa ölkələrdən futbolçu dəvət etməkdənsə, öz qan qardaşlırımıza üstünlük verməyi daha məqsədəuyğün sayıram.

- Eşitdiyimizə görə, həmin futbolçulardan biri əvvəllərdə Türkiyədə oynamış Ramal Hüseynovdu...

- Maraqlandığımız futbolçular arasında Ramalın olub-olmaması haqda heç nə demək istəmirəm. Darıxmayın, yaxın zamanda hər şey aydın olacaq.

- Bir müddət əvvəl maaşların gecikdirilməsi ilə bağlı futbolçular arasında narazılıq olmuşdu. Hətta onlar mətbuat konfransı da təşkil edərək klub rəhbərliyinə etirazlarını bildirmişdilər. Doğrudu, sonradan bu məsələ həllini tapdı. Yenidən belə bir problemin ortaya çıxması mümkündümü?

- Hər bir klubda maaşların gecikməsi ilə bağlı problemlə yaşana bilər. Təəssüf ki, bizdə də belə bir hal baş verdi. Amma rəhbərlik tez bir zamanda bu problemi yoluna qoydu və futbolçular pullarının hamısını son lirəsinə kimi aldı. Onların etirazlarını normal qəbul edirəm, fikirlərinə sayğı ilə yanaşıram. Hər kəs öz haqqını tələb etməkdə azaddı. Əksinə, klub rəhbərliyi futbolçulardan belə bir halın yaşanması səbəbilə üzrhaqlıq etdi. Düşünürəm ki, maaşların 5-10 gün gecikməsi normal qarşılanmalıdı. Ümid edirəm ki, gələcəkdə bir də analoji hallar baş verməyəcək.

- Çoxları son turda “Bucaspor”a asanlıqla məğlub olacağınızı düşünürdü. Çünki, “Dənizlispor” üçün bu oyunun heç bir əhəmiyyəti yox idi. Amma “Bucaspor”un “pley-off”a qatılmaq üçün son oyunu qazanması vacib idi.

- Həmin oyundan əvvəl futbolçular söz verdilər ki, “Bucaspor”u məğlub edəcəyik. Məşqlərdə son oyuna səylə hazırlaşırdılar. Onlar əsl kişilik xarakteri nümayiş etdirdilər və xala ehtiyacımız olmamasına baxmayaraq, qələbə qazandılar. Həmin qələbə ilə deyilənlərin boş söz-söhbətlər olduğunu sübut etdilər. Digər tərəfdən vəziyyət elə gətirdi ki, “Bucaspor” məğlub olmasına baxmayaraq, yenə də “pley-off”a düşə bildi. Çünki əsas rəqibləri də onlar kimi məğlub oldular. İnşallah, “pley-off”da kim güclü olacaqsa, o da Superliqaya vəsiqə qazanacaq.

Söhbətləşdi: İlqar TAĞIYEV