Futbol veteranları kimlərin formalarını yadigar saxlayır? - SORĞU
QURBANOV VƏ DİNİYEVDƏ FRANSIZLARIN, DİGƏRLƏRİNDƏ İSƏ HEÇ KİMİN
Azarkeşlər istər televiziya, istərsə də stadionda futbol matçlarına baxarkən təqdirəlayiq bir halın şahidi olurlar. Oyundan sonra futbolçular rəqib komandanın üzvləri ilə hörmət əlaməti olaraq futbolkalarını dəyişirlər. FİFA-nın verdiyi məlumata görə, ilk dəfə bu hal 1931-ci ildə baş verib. İngilisləri 5:2 hesabı ilə məğlub edən Fransa yığmasının futbolçuları xatirə olaraq onlara formaları dəyişmək təklifi ediblər. 1970-ci il dünya birinciliyində isə iki əfsanə – Pele və Bobbi Mur geyimlərini bir-birlərinə hədiyyə etməklə bu ənənəni yenidən bərpa ediblər. Bəs, görəsən bizim futbolçular hansı dünyaşöhrətli ulduzlarla forma dəyişiblər? Və ya bu istəkdə olublar? Bu məqsədlə vaxtilə millidə çıxış etmiş bir neçə veteran futbolçu ilə əlaqə saxladıq. Məlum oldu ki, onlarda Zinəddin Zidan, Fabio Kannavaro, Zlatan İbrahimoviç kimi futbolçuların formaları var. Düzü, fikir bildirənlərdən heç birinin hazırda dünyanın ən yaxşılarından sayılan Messi və Ronaldo ilə futbolka dəyişmədikləri ortaya çıxdı. Argentina və “Barselona” ilə hələ qarşılaşmadığımızdan Messi variantı başadüşüləndi. Amma Portuqaliya ilə bir neçə dəfə üz-üzə gəlmişik. Özü də həmin qarşılaşmaların birində bir neçə futbolçumuzun eyni zamanda Ronaldodan forma istəməsi... Utancverici hal idi.
Yeri gəlmişkən, çox istərdik
ki, hazırda millinin şərəfini qoruyan futbolçularla əlaqə saxlayıb fikirlərini
öyrənək. Amma əksəriyyəti təlim-məşq toplanışlarında olduğundan bu istəyimiz
baş tutmadı. Məcbur olub veteran futbolçuların fikirləri ilə kifayətlənməli
olduq.
Millidə ən çox oyun keçirən futbolçulardan biri və hamıdan çox – 11
dəfə Azərbaycan çempionu adını qazanmış Mahmud Qurbanov Zinəddin Zidanın
formasını yadigar saxlayır. Fransaya 0:10 hesablı biabırçı məğlubiyyətin
iştirakçılarından biri olan Qurbanov “formadəyişmə əməliyyatı”nı belə
xatırlayır: “Oyundan sonra fransızların formalarını yığıb bizim otağa
gətirdilər. Hərə öz nömrəsinə uyğün maykanı götürdü. Mən də 10 nömrəni. Onda
Zidan adi futbolçulardan biri sayılırdı. Sonradan dünya və Avropa çempionu
oldu. Futbolkanın üzərində oyunun keçirilmə tarixi, yeri yazılmışdı. Amma Zidan
adı yox idi. Sonradan kürəyindəki rəqəmlər qopdu, amma yeri durur”. Heç vaxt
futbolka dəyişmək həvəsində olmadığını bildirən Qurbanov indiyə kimi bir neçə
tanınmamış futbolçuların formalarını “ələ keçirsə” də, heç biri indiyə kimi
qalmayıb. Ya kiməsə hədiyyə edib, ya da köhnəlib.
“Çox istərdim ki, futbolçu
olduğum dövrdə Mişel Platini ilə forma dəyişim. Çünki o adam mənim uşaqlıq
kumirim olub”. Bu sözlər isə uzun illər yığmanın kapitanı olmuş və daha sonra
komandanı çalışdırmış Şahin Diniyevə məxsusdur. Şahin müəllim də Fransaya acı
məğlubiyyətin iştirakçılarındandır. Həmin oyundan sonra fransızlar formalarını
yığıb bizimkilərə hədiyyə etdiklərindən onun da payına “hədiyyə” düşübmüş. Özü
də 8 nömrəli Marsel Desainin. Cüssəli Desainin futbolkası yəqin ki, Şahin
müəllimin əyninə böyük olardı. Diniyev də Mahmud kimi həmin formanı heç kimə
hədiyyə etməsə də yadigar da saxlamayıb: “Hərdən həmin forma ilə futbol
oynayırdım. Köhnəldi, tulladım getdi. Başqa heç kimin forması olmayıb. Çünki o
vaxt cəmi bir dəst forma olurdu və həmin geyimlə bir neçə oyuna çıxmalı idik”.
İstər “Terek”də, istərsə də İsraildə keçirdiyi legioner həyatı vaxtı da kimsə
ilə forma dəyişməyən Şahin müəllim məşqçi olduğu müddətdə futbolçulara forma
dəyişməyi qadağan etməyib. Onsuz da bu qadağa AFFA rəhbərliyi tərəfindən
qoyulmuşdu. Hə, lap yaddan çıxmışdı. Axı, Şahin müəllim Platini ilə forma
dəyişmək arzusunda olub. Eybi yoxdu Şahin müəllim, forma dəyişmək imkanı
olmayıb, pencək dəyişməyə necə baxırsınız?
Millimizin keçmiş “beyni” Vidadi Rzayev Fransa ilə ilk oyunda
meydanda olmasa da, Trabzondakı qarşılaşmada çıxış edənlərdən biri idi. Həmin
oyunda da qonaqlar öz formalarını yığıb bizimkilərə bağışlayıblar. Həm də
futbolçularımızdan formalarını istəyiblər. Bizimkilər isə... Məgər növbəti
oyuna lüt çıxmalıydılar? Fransızlardan yalnız qapıçı Bernard Lamanın “bəxti
gətirib”. “Utanmaz-utanmaz” komandamızın paltardəyişmə otağına gələn Lama
həmkarı Aleksandr Jidkovdan formasını istəyib. Jidkov isə həmin vaxt zədəli
olduğundan forma hayında deyilmiş. Qısası, fransız qapıçı Saşanın yerdəki
palçıqlı formasını götürüb. Bu əhvatalı nəql edən Rzayevə futbolçu karyerasında
heç kimlə forma dəyişmək qismət olmayıb. Səbəbini isə daha əvvəl qeyd etmişdik
– forma qıtlığı: “Yaralı yerimə toxundunuz. Bu qədər futbol oynayasan, heç
kimin forması yadigar qalmaya. O vaxtlar vəziyyət indiki kimi deyildi. Oyundan
əvvəl bizə tapşırırdılar ki, forma dəyişmək olmaz. Hətta bir dəfə Rumıniya ilə
oyundan sonra kimsə bunu etmək istədi. Kənardan bizimkilər bir hay-küy saldılar
ki, adam lap utandı”. Rzayev bir neçə dəfə məşhur futbolçularla “barter”
əməliyyatı aparmaq istəyib. Onların arasında Georgi Hacı, Popesku, Luiş Fiqu,
Erik Kantona, Zinəddin Zidan kimi ulduzlar olub. Amma, zəhrimara qalmış qadağa
onun arzusunu ürəyində qoyub.
Veteran futbolçu Samir Əliyev də heç vaxt forma dəyişmək istəyində
olmasa da, bir neçə dəfə sözügedən “əməliyyat”da iştirak edib. Məşhurların
formalarına gəlincə, Samirin qismətində digər dünya çempionu Fabio Kannavaro
var imiş: “Heç vaxt oyundan sonra kiminləsə forma dəyişmək həvəsində olmamışam.
Düzü, utanmışam kiməsə ağız açım ki, gəl formalarımızı dəyişək. Bir neçə dəfə
belə hal kollektiv şəkildə olub. Yəni, rəqibin formalarını yığıb bizə veriblər,
biz də formalarımızı yığıb onlara. Amma Kannavaro istisnadı. İtaliya ilə
Bakıdakı oyundan sonra paltardəyişmə otağına gedərkən demək olar ki, bütün
futbolçular formalarını dəyişmişdilər. Təkcə mən və ondan başqa. Üz-üzə gəldik
və heç birimiz bir söz demədən futbolkaları dəyişdik”. Samir də o vaxt futbolka
dəyişməyin çətin olduğunu bildirdi. Çünki, komandanın cəmi 1 dəst forması var
idi və həmin forma ilə bir neçə oyuna çıxmalı idilər. Bu üzdən AFFA rəsmiləri
bunun əleyhinə idilər. Kannavaronun formasına gəlincə, Samir İtaliya ilə
oyundan qalan “yadigar”ı yaxın adamlardan birinə hədiyyə edib.
Əliyevin adaşı Musayev də isə məşhurların heç birinin forması
olmayıb. Olanları isə qohum-əqrabaya paylayıb: “Uelsin 4, Serbiyanın 6,
Qazaxıstanın 3, Portuqaliyanın 23 nömrəli formaları... qalıb ki, qohum-əqraba
hamısını dağıdıb. O vaxt “mayka” dəyişəndə hərə bir mız qoyurdu. Oyunlardan
sonra rəqibin formalarını yığıb bizə gətirirdilər. Biri də qalmırdı, bizimkilər
hamısını götürürdülər. İnanırsınız, elə vaxt olurdu ki, onlar bizim formaları
götürmürdülər. Nələrinə lazım idi ki?”
Samirdən kiminlə formaları həvəslə dəyişmək istəyində olduğunu soruşduq:
“Bacco, Messi, Ronaldiyno, Zidan, Xavi, Anri... Çox istərdim ki, elə
futbolçuların formalarından ibarət koleksiyam olsun. Amma gecdi, artıq futbola
vidalaşmışam. Futbolçu olanda millidə cəmi 10-15 oyunda meydana çıxmışam. Bəlkə
də çox oynasaydım, kiçik bir kolleksiya toplaya bilərdim”.
Futbolsuvərlərin yaddaşında daha çox Makedoniya, Serbiya və
Finlandiya ilə Bakıda keçirilən oyunların son dəqiqələrində fərqlənən və
“Karvan”dakı çıxışı ilə yadda qalan Fərrux İsmayılovun forma kolleksiyası
digərərinə baxanda bir qədər genişdi. Ən çox rəqib meydanında İsveçlə keçirilən
oyundan sonra ona yadigar qalan 16 nömrəli futbolka haqqında danışan Fərrux
illər sonra həmin formanın sahibinin dünya şöhrətli Zlatan İbrahimoviçə məxsus
olduğunun fərqinə varıb: “İsveçlə oyunda mən ehtiyaitda qalmışdım. İkinci
hissədə heç kimin tanımadığı İbrahimoviç 16 nömrə altında meydana daxil oldu və
dərhəl da qapımıza qol vurdu. Oyundan sonra rəqibin futbolkalarını yığıb bizim
paltardəyişmə otağına gətirdilər. Özüm də 16 nömrə idim deyə, Zlatanın
formasını götürdüm. Haradan biləydim ki, vaxt gələcək həmin futbolçunu bütün
dünya tanıyacaq? İndiyə kimi də o forma məndə qalır”. Söz düşmüşkən, həmin
forma ilə İbrahimoviç millidə ilk rəsmi oyununa çıxıb və ilk qolunu vurub.
Yarızarafat, yarıgerçək – gələcədə hərraca çıxarılsa, həmin formanın satışından
Fərrux əməlli-başlı pul qazana bilər.
Digər futbolçulara gəlincə, italyan Tomazzi ilə yanaşı daha bir neçə
məşhur olmayan futbolçuların futbolkaları Fərruxun kolleksiyasını bəzəyir:
“Uelsin 7, İranın 27 nömrəsinin də formalarını saxlamışam. Amma heç tanımıram
kimlərdi. Düzdür, Tomazzinin formasını geymişəm deyə, təzə qalmayıb, o biriləri
isə pis deyil”. İndiyə kimi Maradonanı özünə kumir sayan İsmayılov heç vaxt
forma dəyişmək həvəsində olmayıb, özünə sığışdırmayıb. Ancaq dediyinə görə,
böyük hörmət bəslədiyi Alessandro del Pyero və Ronaldinyoya qarşı oynasaydı,
bəlkə də qürurunu bir anlıq kənara qoya bilərdi.
Bilirsiniz müstəqillik qazanandan sonra klublar arasında beynəlxalq
oyunlarda ilk forma dəyişən kim olub? “Turan”ın və millimizin “5 nömrə”si Sakit
Alıyev. Bu hadisə “Turan”ın “Fənərbaxça” ilə Bakıda baş tutan cavab
qarşılaşmasında baş verib. Sakit nömrəsinə uyğun olaraq “Fənər”in 5 nömrəli
futbolçusu ilə formasını dəyişib. Təəssüf ki, Alıyev həmin futbolçunun adını
xatırlamır. Nəinki həmin futbolçunun, ümumiyyətlə, indiyə kimi kiminlə
“alış-veriş”də olduğunu da: “Səhhətimlə əlaqədar yaddaşım korlanıb. Bilirəm ki,
istər “Turan”da, istərsə də millidə çıxış edən vaxtlar əksər oyunlardan sonra
kiminləsə forma dəyişirdim. Əksər hallarda da 5 nömrəli futbolçularla. Amma
təəssüf ki, heç birini xatırlamıram”. Aldığı futbolkalardan heç birinin
qalmadığını bildirən Alıyev onları birinci istəyənə hədiyyə edib. Yəni, biri də
olsun qalmayıb.
Heç qapıçılardan söz açmadıq. Sakit Alıyevin həmyerlisi, millidə
xeyli oyunda komandamızın qapıçını qorumuş Hüseyn Məhəmmədov isə heç vaxt forma
dəyişməkdə problem yaşamayıb. Hətta məşhur isimlərin futbolkalarını indiyə kimi
saxlayıb. Onlardan biri də Canluici Buffondu: “Bakıdakı oyunda ehtiyat qapıçı
idim. Oyundan sonra Buffona yaxınlaşaraq formasını istədim. “No problem” deyib
əynindəki futbolkanı mənə verdi. İndiyə kimi də həmin forma məndə qalır, heç
kimə hədiyyə etməmişəm”. Buffondan başqa Hüseyndə Bernar Lamanın da futbolkası
ola bilərdi. Amma yazının əvvəlində qeyd etdiyimiz kimi Lama Hüseynə deyil,
Jidkova yaxınlaşıb formasını istəyib. Həmin oyunda da ehtiyatda olan Məhəmmədov
əliboş qalıb. Digərlərinə gəlingə, veteran qapıçıda Rumıniya millisinin,
Fransanın olimpiya yığmasının və digər komandaların qapıçılarının forması olub.
Amma məşhur olmayanların formalarını sonradan geyinərək “sıradan çıxarıb”.
Nəhayət gəlib çatdıq Nazim Süleymanova. Ən titulu legionerimiz milli
ilə yanaşı “Alaniya”nın heyətində bir çox beynəlxalq oyunlarda, hətta
futbolçularımıza xülya kimi görünən Çempionlar Liqasının iştirakçısı olub.
Millini başa düşdük, yığmada oynadığı dövründə forma dəyişmək az qala cinayət
hesab olunurdu. Bəs, “Alaniya”ya nə deyirsiniz Nazim müəllim? “Nə yatdıq ki, nə
də yuxu görək. Bir-iki oyunda çıxış etdik, həmin oyunlarda da uğurlu nətiə
olmadı deyə, meydançanı dilxor tərk elədik. Forma dəyişmək heyində deyildik.
Amma indi düşünürəm ki, heç olmasa bir-iki məşhur futbolçunun futbolkasını yadigar
saxlamaq olardı”.
“Het-trik news”
Şərh yazılmayıb
|
ŞƏRH YAZ
|
"Qalatasaray"ın 3 müdafiəçisi Super Liqa matçında oynamayacaq
“Mançester Siti” Fodenin müqaviləsini uzadacaq
“Mən də azərbaycanlıyam, millidə oynamaq istəyirəm” – “Araz Naxçıvan”ın hücumçusu
MY-in maraqlandığı “Everton”lular
Pep belçikalı oyunçusu barədə danışıb
Moyesin oğlu onunla bərabər çalışacaq
“Mançester Siti” qolkiperini itirdi
"Fənərbaxça"da itki
"Arda Gülerin böyük gələcəyi var"
"Qarabağ" azarkeşlərə müraciət etdi
Rahilin komandası səfərdə qalib gəldi
"Araz-Naxçıvan" "Qarabağ"ın yetirməsini transfer etdi
"Trabzonspor"dan ayrılıb sabiq klubuna qayıtdı
Qara Qarayev "Neftçi"də - RƏSMİ
12.03.2024
24.07.2023
22.07.2023
21.07.2023
20.07.2023
19.07.2023
18.07.2023
17.07.2023
16.07.2023
15.07.2023
O | Q | H | M | T-f | X | |||
1. | Neftçi | 28 | 18 | 5 | 5 | 47-25 | 59 | |
2. | Qarabağ | 28 | 16 | 9 | 3 | 64-18 | 57 | |
3. | Sumqayıt | 28 | 10 | 9 | 9 | 30-31 | 39 | |
4. | Zirə | 28 | 8 | 14 | 6 | 28-28 | 38 | |
5. | Sabah | 28 | 7 | 8 | 13 | 28-39 | 29 | |
6. | Keşlə | 28 | 5 | 11 | 12 | 25-40 | 26 | |
7. | Qəbələ | 28 | 5 | 11 | 12 | 23-44 | 26 | |
8. | Səbail | 28 | 5 | 9 | 14 | 21-42 | 24 | |
08.05 | Səbail | --- | Neftçi |
08.05 | Keşlə | --- | Sumqayıt |
09.05 | Zirə | --- | Qəbələ |
09.05 | Sabah | --- | Qarabağ |
14.05 | Sumqayıt | - | Neftçi |
14.05 | Qarabağ | - | Keşlə |
14.05 | Qəbələ | - | Sabah |
14.05 | Zirə | - | Səbail |