Millimizin baş məşqçisi: "Sparrinq-rəqib tapa bilmirik" - MÜSAHİBƏ

20.04.2015 | 2808 dəfə oxunub

Bakıda 16 yaşadək qızlardan ibarət komandalar arasında keçirilmiş UEFA-nın İnkişaf turnirinin qalibi olan müvafiq yaş qrupuna aid Azərbaycan yığmasının baş məşqçisi Siyasət Əsgərov affa.az-a müsahibə verib. Stadium.Az həmin müsahibəni təqdim edir:

- Əvvəlcə turnirlə bağlı fikrinizi bilmək istərdik. Təəssüratlarınız necədir?
- Bu qəbildən olan turnirlər qadın futbolu sahəsində yeni işə başlayan ölkələr üçün çox əhəmiyyətlidir. Həm futbolçuların beynəlxalq təcrübə toplaması, həm də komandadakı problemləri görmək baxımından vacib oyunlar keçirdik. Ümumiyyətlə, il ərzində belə turnirlər iki dəfə keçirilir. Birincisi Bakıda təşkil olundu, digəri isə iyulda Moldovada baş tutacaq. Məqsədimiz paytaxtımızdakı turniri qələbə ilə başa vurmaq, həm də komandadakı problemləri üzə çıxarıb, aradan qaldırmaq idi. Qaydalara əsasən, komandanın bütün üzvləri 3 oyun ərzində ən azı 80 dəqiqə meydanda olmalı idilər. Onu da qeyd edim ki, biz yeni komanda qururuq. Ötənilki heyətin əksər üzvləri yaşla əlaqədar komandadan ayrıldılar. Bu, yeni komanda ilə ilk ciddi turnirimiz idi. Komandadan tam razı olduğumu deməyim düzgün çıxmazdı. Çünki səhvlərimiz var, amma bunlar düzəldilə biləcək səhvlərdir. Bunun üçün vaxtımız da var. Qazaxıstan yığması ilə oyundan razı qalmadım. Zəif çıxış etdik. Məcburiyyətdən edilən əvəzetmələrin də buna təsiri oldu. 80 dəqiqə limiti bu oyunda dolmalı idi ki, biz Yunanıstanla oyuna əsas heyətlə çıxaq. Milliyə yeni dəvət etdiyimiz futbolçular var, onlar hələ tam uyğunlaşmayıblar.
 
- Səhvlərdən danışdınız. Həmin səhvlər nədən qaynaqlanırdı?
- Qadın futbolunda inkişaf etmiş ölkələrdən deyilik. Bu sahədə ilk addımlarımızı atırıq. Bakıda hazırlıq keçən zaman yoxlama oyunu keçirmək üçün sparrinq-rəqibimiz ola biləcək qadın komandaları tapa bilmirik. Məcburiyyətdən oğlanlarla oynayırıq. Həmin oyunlar da biz istəyən effekti vermir. Həm də beynəlxalq yarışlar zamanı qızlar təzyiq altında olurlar. Çünki oyun təcrübəmiz azdır. Əksəriyyəti milliyə yeni dəvət edilib. Səhvlər də həmin gərginlikdən qaynaqlanır. Taktiki-texniki səhvlərimiz olur, üzərində işləməliyik.
 
- Hazırda bir neçə yaş qrupu üzrə qızlar liqaları keçirilir. Liqalar seçim imkanlarınızı artırırmı?
- Kütləvilik baxımından hər şey bizi qane edir. Artıq bu say çoxluğunu keyfiyyətə çevirməliyik. İndi maraq yaranıb, qalır keyfiyyəti artırmaq. AFFA-nın liqaları təşkil etməkdə əsas məqsədi də budur. Bu gün ölkəmizdə istedadlı qızlar çoxdur. Yeni bir layihəmiz var. Layihəyə əsasən klublardakı istedadlı qızlara həftənin 5 günü yığmanın məşqçiləri əlavə məşqlər keçir. Artıq bunun bəhrəsini görürük.
 
- Bu, klubların işinə mane olmur ki?
- Xeyr, çünki həftəsonu onlar klublarına yollanırlar və çempionat oyunlarında iştirak edirlər.
 
- Təbii ki, bu hazırlığın hamısı payızda keçiriləcək Avropa çempionatının ilkin seçmə mərhələsinin oyunları üçündür. Qrupda Çexiya, Belçika və Gürcüstan yığmaları ilə qarşılaşacaqsınız…
- Məqsədimiz seçmə oyunlar zamanı uğur qazanmaqdır. İkinci mərhələyə yüksəlmək istəyirik. Bunun üçün imkan da var. Hər 3 oyundan qənaətbəxş nəticə ilə ayrılmaq istəyirik.
 
- Komandada özünəinam hansı səviyyədədir?
- Futbolçular Gürcüstan yığması ilə əla oynadılar. Qazaxıstan komandası ilə matçda zəif oynamağımızın səbəbi həm də gürcülərə qarşı oynayan futbolçularda bir qədər arxayınlıq yaranması oldu. Fikirləşdilər ki, Yunanıstan Qazaxıstana 10 qol vurub, biz də vuracağıq. Hər nə qədər onları bu ab-havadan ayırmaq istəsək də, alınmadı. Yunanıstanla oyuna isə komandanı yaxşı köklədik və oyun zamanı yenilmədik. Oyundan sonra onlara izah etdik ki, əgər Yunanıstan yığmasına uduzmamışıqsa, seçmə mərhələ oyunları zamanı qrupumuzdakı rəqiblərimizdən də xallar ala bilərik. Bir məsələni də qeyd edim. Əldə edilən nəticəyə görə təbii ki, futbolçulara və məşqçilər korpusuna təşəkkür edirik. Ancaq qapıçılarla işləyən məşqçimiz Ruslan Quliyevin əməyini xüsusi qeyd etmək istərdim. Çünki Yunanıstan yığması ilə oyunun sonlarına yaxın o təkid etdi ki, qapıçını dəyişək. Həmin əvəzləmə penalti seriyasının taleyini həll etdi.
 
- Qarşıdakı planlar necədir?
- İyulda Moldovada təşkil ediləcək İnkişaf turnirinə qatılacağıq. Seçmə mərhələdən əvvəl isə təlim-məşq toplanışımız və yoxlama oyunlarımız olacaq.



Şərh yazılmayıb
ŞƏRH YAZ
Adınız *  
E-mail    
Təhlükəsizlik kodu    
Kodu daxil edin *  



Çox oxunan xəbərlər
Son xəbərlər

12.03.2024

24.07.2023

22.07.2023

21.07.2023

20.07.2023

19.07.2023

18.07.2023

17.07.2023

16.07.2023

15.07.2023

   
  O Q H M T-f X
1. Neftçi 28 18 5 5 47-25 59  
2. Qarabağ 28 16 9 3 64-18 57  
3. Sumqayıt 28 10 9 9 30-31 39  
4. Zirə 28 8 14 6 28-28 38  
5. Sabah 28 7 8 13 28-39 29  
6. Keşlə 28 5 11 12 25-40 26  
7. Qəbələ 28 5 11 12 23-44 26  
8. Səbail 28 5 9 14 21-42 24  
08.05Səbail ---Neftçi
08.05Keşlə ---Sumqayıt
09.05Zirə ---Qəbələ
09.05Sabah ---Qarabağ
14.05Sumqayıt -Neftçi
14.05Qarabağ -Keşlə
14.05Qəbələ -Sabah
14.05Zirə -Səbail