“Qəbələ”nin 17 yaşlı futbolçularından ibarət komandası dekabrın 15-dən 21-dək Braziliyada keçiriləcək "Laranja Mekanika Beynəlxalq Kuboku" turnirində iştirak edəcək. Stadium.az klubun rəsmi saytına istinadən xəbər verir ki, yarış Braziliya Federativ Respublikasının Parana ştatının Araponqas şəhərində təşkil olunacaq.
Təmsilçimiz səfərə sabah Bakı – İstanbul - San-Paulu - Londrina reysi ilə çıxacaq. Turnirə 2 gün əvvəldən getməkdə məqsəd yerli mühitə uyğunlaşmaqdır.
Akademiyanın hollandiyalı direktoru Stenli Brardın başçılıq etdiyi kollektiv Cənubi Amerikaya 22 futbolçu ilə yola düşəcək: qapıçılar: Turxan Həsənov, Elnur Orucov, Toğrul Məhəmmədbəyli; müdafiəçilər: Bəhlul Mustafazadə, Çingiz Hüseynov, Sahil Mirzəyev, Ayxan Əsədov, Mirəli Məmmədzadə, Yusif Nəbiyev, Elmiz İsmayılov; yarımmüdafiəçilər: Hacıağa Hacıyev, Fərid Məmmədov, Tural Məmmədrzayev, Əli Səmədov, Emin Zamanov, Baxşəli Baxşəliyev, Rövlan Muradov; hücumçular: Əziz İsmayılov, Ramiz Məmmədzadə, Roman Hüseynov, Ülvi İskəndərov, Muxtar Əliyev.
Oyunlar Bələdiyyə Stadionunda (Estadio Municipial) və “Laranja Mekanika” stadionunda keçiriləcək. Turnirin açılış matçında “Qəbələ” meydan sahibi “Laranja Mekanika” ilə üz-üzə gələcək. Yarışda 8 komanda 2 qrupda mübarizə aparacaq:
A qrupu: “Laranja Mekanika”, “Palmeyras” (hər ikisi Braziliya), “Əl-Əhli” (BƏƏ), “Qəbələ”
B qrupu: “Koritiba”, “Flamenqo”, “Londrina” (hamısı Braziliya), “Mohammed VI” Futbol Akademiyası (Mərakeş)
Turnirin təqvimi belədir: 15 dekabr 17:00 “Laranja Mekanika” – “Qəbələ”
"Laranja Mekanika Beynəlxalq Kuboku” eyni zamanda işgüzar xarakter daşıyacaq. Belə ki, Stenli Brard dekabrın 18-də yerli mütəxəssislər və turnir iştirakçıları üçün seminar keçirəcək.