"Mən heç vaxt deməmişəm ki, istefa vermişəm. Mən hələ "Xəzər Lənkəran"ın baş məşqçisiyəm". Stadium.Az xəbər verir ki, bu fikirləri "Xəzər Lənkəran" klubunun baş məşqçisi Mirça Rednik deyib. Avroliqanın II təsnifat mərhələsində Təl-Əvivin "Makkabi" klubu ilə iyulun 21-də Lənkəranda oyunda (0:0) mübarizəni dayandırdıqdan sonra vətəninə yollanan rumıniyalı mütəxəssis postunda qalmasını təsdiqləyib. Halbuki matçdan dərhal sonra ölkəmizi tərk edən Rednikin istefası haqda xəbərlər dolaşdı. Ancaq Rednik apasport.az-a olduğu kimi, Rumıniya mətbuatına da iyulun 25-də ölkəmizdə olduğunu bildirib: "Bazar ertəsi Azərbaycana qayıdıb, klubun rəhbərliyi ilə görüşəcəyəm. Bundan sonra nə edəcəyimizi görüb, planlarımızı müzakirə edəcəyik. Legionerlərin "Xəzər Lənkəran"dan getmələri üçün gərək komandadan azad olunmalıdırlar. Hələ heç bir futbolçu Lənkəran təmsilçisindən kənarlaşdırılmayıb". "Xəzər Lənkəran" "Makkabi" ilə oyunun ertəsi yaydığı bəyanatda siyasətini dəyişdiyini, legionerləri və bir sıra futbolçuları ilə yollarını ayırdığını açıqladı. Gənc futbolçuların yetişdirməyi ilə məşğul olmağı qərara alan lənkəranlılar Rednikə yerli oyunçulardan qurulan komandanı çalışdırmağı tapşıracaq.rnrnrnrn